San Francisco

So, ändli schribi üch weder mal öppis :-)

Die letzte Täg hei mir z San Francisco verbrocht. Wunderschöni Stadt, s Meli het rächt gha :-)

I ha mit weder mal nid chönne im Zaum halte u ha sooooo vill Fötteli gschosse. I due jetz es paari i eim Blogitrag zämefasse, deför gits chli en längere. Vill Spass :-)

Mir fönd grad mit es paar allgemeine Fötteli vo San Francisco ah. San Francisco isch die viertgröschti Stadt im Staat Kalifornie u het guät 805'000 Iwohner. Am 18. April 1906 sind drü Viertu vor Stadt durch nes Ärdbebe u druffolgende Bränd zerstört oder schwär beschädigt worde.

Als nögschts muess natürli s Wahrzeiche vo San Francisco no gwürdiget wärde. Eigentli luschtig, dass d Golden Gate Bridge so bekannt isch. Di ander Brügg in San Francisco isch nämmli um einiges länger und doppelstöckig befahrbar im Gägesatz zur Golden Gate Bridge. Aber sie het nid so vill Charme ;-)

Sitt 1995 zählt d Golden Gate Bridge zu de moderne Wältwunder. Di typischi roti Farb ("international orange") isch eigentli es Roschtschutzmittel. Ursprünglich hätt d Brügg no sölle grau oder schwarz-gelb übermolet wärde. S Rot het denn aber de Iwohner und am Ingenieur so guät gfalle, dass es grad bi dem isch blibe :-) Üs gfallts! :-D

Bi de Piers am Meer vore gits also ou einiges z gseh. Mir si richtig is Stuune cho, was es dert alles git. D Fötteli gänd nur es abgschwächts Bild vo dere Touri-Stimmig (im positive Sinn) wieder.

Sehr bekannt isch natürli d Alcatraz Insle. Dert druf isch vo 1934 bis 1963 es Hochsicherheitsgfängis gstande und de erschte Lüchtturm vor Weschtküschte. Die jewilige Wächter, wo agstellt gsi sind, händ ebefalls mit ihrere ganze Familie uf dere Insle gwohnt.

Das Bild unde vo dem "Maschineruum" isch im Innere vo de USS Pampanito, es U-Boot vo de Amerikaner im 2. Wältchrieg. Ziemlich äng dert inne...

E chli China-Luft gschnupperet hei mir ou no :-)

Dä Stadtviertel isch so faszinierend, dass är e eigeti Galerie verdient het. Dert chunnt fasch Märet-Stimmig uf, das wär auso ou öppis für Tessiner-Märet-GängerINNE :-)

Dim Sum übrigens "All you can eat" für 5.99 $ :-)

Es witters Wahrzeiche vo San Francisco. Wär kennt si nid, die bekannti Cable-Car Bahn. Mega härzig, passt eifach wunderbar zu dere Stadt. Immer sehr voll, daher heimer d Bähnli nur vo usse bestuunt.

1947 het übrigens de damalig Bürgermeischter d Cable Car wele absetze. Dur s "Komitee zur Rettung der Cable Cars" ischs denn aber zunere Volksabstimmig cho, wodurch s Witterbestoh vo dere historischi Bahn mit knapp 167'000 zu guät 50'000 Stimme sehr dütlech isch agno worde. I like! :-)